Letra da Música Hurricane Blues de Linton Kwesi Johnson

lang-time lovah
mi mine run pan yu all di while
an mi membah ow fus time
di two a wi come een - it did seem
like two shallow lickle snakin stream
mawchin mapless hapless a galang
tru di ruggid lanscape a di awt sang
an a soh wi did a gwaan
sohtil dat fateful day
awftah di pashan a di hurricane
furdah dan imaginaeshan ar dream
wi fine wiself lay-dung pan di same bedrack
flowin now togheddah as wan stream
ridin sublime tru love lavish terrain
lush an green an brite awftah di rain
shimmarin wid glittahrin eyes
glowin in di glare a di smilin sun

lang-time lovah
mi feel blue fi true wen mi tink bout yu
blue like di sky lingahrin pramis af rain
in di leakin lite in di hush af a evenin twilite
wen mi membah ow fus time
di two wi come een - it did seem
like a lang lang rivah dat is wide an deep

sometime wi woz silent like di langwidge a
rackstone
sometime wi woodah sing wi rivah sang as
wi a wine a galang
sometime wi jus cool an caam andah plenty
shady tree
sometime sawfly lappin bamboo root as
dem swing an sway
sometime cascadin carefree doun a steep
gully bank
sometime turbulent in tempahment wi flood
wi bank
but weddah ebb ar flow tru rain tru drout
wi nevah stray far fram love rigid route

ole-time sweet-awt
up til now mi still cyaan andahstan
ow wi get bag doun inna somuch silt an san
rackstone debri lag-jam
sohtil wi ad woz fi flow wi sepahret pawt
now traversin di tarrid terrain a love lanscape
runnin fram di polueshan af a cantrite awt
mi lang fi di marvelous miracle a hurricane
fi carry mi goh a meetin stream agen
lamentin mi saltid fate
sohmizin seh it too late